2022-04-09 - 05:31
ناساندنی مایکرۆسۆفت داینامیکس ٣٦٥
داینامیکس ٣٦٥ بەشێکە لە خزمەتگوزارییەکانی
مایکرۆسۆفت لە بواری بزنسدا، کە ئامانجی کۆکردنەوەی یەکە جیاوازەکانی بزنسە بە
بەیەکەوەبەستنی خەڵک و داتاکانیان و بەکارهێنانەوەیان لە شوێنە پێویستەکاندا.
داینامیکس ٣٦٥ چییە؟
مایکرۆسۆفت داینامیکس ٣٦٥
بریتییە لە کۆکراوەی تایبەتمەندییەکانی ERP و CRM بە یەکەوە، یەکێک
لە باشترین بژاردەکانە بۆ ڕێکخستنەوە و بەڕێوەبردنی بزنسەکەت بە شێوەیەکی کارامە.
بە کورتی چارەسەرێکە بۆ هەموو جۆرەکانی بزنس. مۆدیوڵ و بەرنامەی تایبەت لە
خۆدەگرێت بۆ هەموو ئەو بەشانەی کە لە کارگێڕی و بەڕێوەبردنی دامەزراوەیەکدا
بوونیان هەیە. وەک بەشی:
- فرۆشتن (Sale)
- مارکێتینگ (Marketing)
- دارایی (Finance)
- سەرچاوە مرۆییەکان (HR)
- بەڕێوەبردنی پڕۆژە (Project Management)
- خزمەتگوزاریی مەیدانی (Field Service)
- بەرهەمهێنان (Manufacturing)
- دابەشکردن (Distribution)
- خزمەتگوزاری کڕیار (Customer Service)
- شیکاری بزنس (Business Analytics)
- زنجیرەی دابینکاری (Supply Chain)
وەک وتمان داینامیکس ٣٦٥ داتای هەموو
یەکەکانی جیاوازەکانی بزنسەکەت دەبەستێتەوە بە یەکەوە، داینامیکس بەوە بەناوبانگە
کە ڕووکارێکی هاوڕێیانە و ئاسانی هەیە بۆ بەکارهێنەر و ئەو بزنسانەی کە ئاشنان بە
بەکارهێنانی مایکرۆسۆفت ٣٦٥ و مایکرۆسۆفت ئۆفیس هیچ کێشەیەکیان نابێت لە
بەکارهێنانیدا.
داینامیکس ٣٦٥ چۆن کاردەکات؟
داینامیکس ٣٦٥ هەموو داتاکانی کڕیار و فرۆشتن لە یەک سیستەمدا کۆدەکاتەوە و
دەیکاتە سەرچاوەی هەموو بڕیارەکان، بەمەش وێنە گەورەکەی سوڕی ژیانی کڕیار و تەواوی
بەرکەوتنەکانی کڕیار لەگەڵ ئەو بزنسەدا دەبەخشێت بە بەکارهێنەر و ئەمەش
ئاسانکارییەکی تەواو دەکات بۆ بەکارهێنەر لەوەی لە چی ناوەندێکدا بگەن بە
کڕیارەکانیان و خێراتر مامەڵەکان کۆتایی پێبهێنن. داینامیکس هەموو ئەو کارانەی گرنگ
و هەستیارن یان ئەو چالاکیانەی کە کاتێکی زۆر دەوێت بە شێوەیەکی خۆکار ئەنجامیاندەدات
ئەمەش وادەکات بزنسەکەت بە شێوەیەکی کاریگەر و کارامەتر بڕوات بەڕێوە.
داینامیکس بۆ ئەوە دیزاینکراوە کە زۆرترین توانای خۆگونجاندن و فراوانبوونی
هەبێت بە پێی پێویستی و داواکارییەکانی بزنسەکەت، هەروەها بە هۆی ئەم توانای
خۆگونجان و گەسەندنە بەردەوامەوە داینامیکس دەتوانێت داواکارییەکانی هەموو جۆرە
بزنسێک پڕبکاتەوە.
بەش و مۆدیوڵە جیاوازەکانی داینامیکس ٣٦٥:
لەبەر ئەوەی داینامیکس چارەسەرێکی یەکجارییە بۆ هەموو جۆرەکانی بزنس، بۆیە
چەندەها بەش و مۆدیوڵی جیاواز لە خۆدەگرێت و تۆش دەتوانیت تەنها ئەو مۆدیوڵانە
هەڵبژێریت کە پێویستن بۆ بزنسەکەت.
فرۆشتن: ئەم مۆدیوڵە بۆ تیمی فرۆشتنە، بۆ ئەوە دیزاینکراوە کە پڕۆسەی
فرۆشتن و کۆتایهێنان بە مامەڵەکان ئاسانتر بکات بۆ بزنسەکەت. جا کۆمپانیاکەت لە
جۆری B2B یان B2C بێت دەتوانیت سوود لە مۆدیولە وەربگریت.
- بەرچاوڕوونی و داتای زیندوو.
- بەڕێوەبردنی پەیوەندییەکان.
- بەرهەم و ئاستی فرۆشتن.
مارکێتینگ: لە ڕێگەی مۆدیوڵی مارکێتینگەوە دەتوانیت بە خێرایی کامپەینی
مارکێتینگەکەت بخەیتە ئیش و بەڕێوەی بەریت. یارمەتیت دەدات لەوەی پەیوەندییەکی
بەهێزتر بنیادبنێیت لەگەڵ کڕیارەکانتدا و لە ڕێگەیەوە ئاست و بەرهەمی بزنسەکەت
گەشەپێبدەیت ئەمەش بە پێکەوە بەستنی بەشی فرۆشتن و
مارکێتینگ.
- بەڕێوەبردنی کەمپەین لە کەناڵ جیاوازەکاندا.
- بەڕێوەبردنەوە بۆنەکان.
- قاڵبی ئامادەکراو.
- داتا و بەرچاوڕوونی.
- دۆزینەوەی کڕیار لە ڕێگەی لینکیدئینەوە.
بزنس سێنتڕاڵ: مایکرۆسۆفت داینامیکس بزنس سێنتڕاڵ بریتییە لە چارەسەرێکی
"هەموو لە یەکدا" بۆ بزنسە قەبارە مامناوەند و بچووکەکان بە ئامانجی
بەڕێوەبردنی دارایی و زنجیرەی دابینکاری و بەرهەمهێنان، لەگەڵ بەڕێوەبردنی پڕۆژە و
خزمەتگوزارییەکان.
- کەمکردنەوە و کۆنتڕۆڵکردنی تێچووەکان.
- دیاریکردنی ڕۆڵی هەر فەرمانبەرێک و زیادکردنی بەرهەم.
- گەشەپێدانی فرۆش و خزمەتگوزاری کڕیار.
- بەڕێوەبردنی بزنسەکەت لە هەر کوێ بیت(سوپاس بۆ كڵاود).
- لەگەڵ گەشەسەندنی بزنسەکەتدا سیستەمەکەشت فراوان بکە.
دارایی: ئەم مۆدیوڵە بریتیە لە چارەسەرێکی ERP بۆ هەموو کۆمپانیا جیهانییە قەبارە مام
ناوەند و گەورەکان. ئاسانکردن و باشترکردنی پڕۆسەکانی بەشی دارایی و ژمێریاری و
ئەنجامدانیان بە شێوەیەکی خۆکار.
- دیاریکردنی ئاڕاستەی هاتوچۆی پارە.
- پلاندانان بۆ بودجە و کۆنتڕۆڵکردنی.
- دروستی ڕاپۆرت و هێڵکاری.
سەرچاوە مرۆییەکان: ڕێکخستنی کاروباری کارمەندانی کۆمپانیاکەت هەر لە کاتی
دامەزراندنیەوە بۆ خانەنشینبوونی، دۆزینەوە و وەرگرتنی کارمەندی نوێ.
- ئاسانکردنی کارە ڕۆتینییەکانی کۆمپانیا.
- دروستکردنی پڕۆفایل بۆ هەر کارمەندێک.
- ڕێکخستنی چالاکی و سیمینار و هەر ئەرکێکی تری کارمەند.
- ڕۆژی پشوو و هاتن و نەهاتنی کارمەندان.
- ڕێکخستنی مووچە و باج و هەر تێچوویەکی تری کارمەندان.
- پەیوەستبوون بە لینکیدئینەوە بۆ دۆزینەوەی کارمەندی نوێ.
بەڕێوەبردنی پڕۆژە: لە ڕێگەی ئەم مۆدیوڵەوە دەتوانیت پلان بۆ پڕۆژەکانت
دابنێیت و بە گرافیکی شتەکان ببینیت، بزانیت کام ئیشە تەواو بووە و کامیان هێشتا
لە ژێرکارکردندایە، لەگەڵ بەڕێوەبردنی سەرچاوە و پێداویستییەکان.
- بەڕێوەبردنی بەڵێنامە و دۆکیومێنتی پڕۆژەکانت.
- بەڕێوەبردنی پڕۆژەکان بە شێوەیەکی کارامە.
- پلاندان بۆ بودجە و تێچوو و پێداویستی پڕۆژەکان.
- دیاریکردنی کات و بەڕێوەبردنی ئەرکەکان.
خزمەتگوزاریی مەیدانی: ڕێکخستنەوە و نەهێشتنی ئەو بەربەستانەی کە ڕووبەڕووی
تیمە تەکنیکییەکان دەبێتەوە، لە ڕێخستنی کات و شوێنی چاوپێکەوتن و دۆزینەوە شوێنی
کڕیار و ڕێگا.
- ئاسانکردنی ئاڵوگۆڕی زانیاری لە نێوان کۆمپانیا و تیمی تەکنیکی و کڕیار.
- تەکنەلۆژیای ئینتەرنێتی شتەکان (IoT).
- زیرەکی دەستکرد.
- نەخشەی زیندوو و پڕ لە وردەکاری.
بەرهەمهێنان: بێگوومان ئەو کۆمپانیایانەی لە پیشەسازی بەرهەمهێنان لە
ئاستێکی گەورەدا کار دەکەن، داتایەکی یەکجار زۆریان هەیە بۆ بەڕێوەبردن کە
گرنگیەکی زۆری هەیە بۆ ئەو بزنسە ئەگەر بە شێوەیەکی دروست بەکاربهێندرێتەوە.
- بەڕێوەبردنی سەرچاوە و سەرمایەکان.
- بە دیجیتاڵکردنی پرۆسەکان.
- باشترکردنی ئەزموونی بەکارهێنەر.
- زیادکردنی بەرهەم.
فرۆشگا: ئەم مۆدیوڵە تایبەتە بە فرۆشگاکان جا فرۆشگاکەت ئۆنڵاین بێت یان بە فیزیکی بوونی هەبێت.