2021-12-07 - 11:27

ئایە KMSpico پارێزراوە بۆ چالاککردنی ویندۆزەکەت؟

کەی ئێم سپیکۆ یەکێکە لەو ئامرازانەی بەکاردەهێنرێت بۆ چالاککردنی ویندۆز و بەرنامەکانی مایکرۆسۆفت ئۆفیس بەبێ ئەوەی لایسنسەکە بکڕیت و پارەبدەیت، واتە بەکاردەهێندرێت بۆ كڕاککردنی ویندۆز و بەرنامەکان. زۆربەی ئەو ویندۆزانەی لە کوردستاندا بەکاردەهێندرێت و لە دووکانەکانی ناوبازاڕدا دەفرۆشرێت بەم ئامڕازە چالاک کراون. پرسیارەکە ئەوەیە ئایە ئەم ئامڕازە پارێزراوە بۆ بەکارهێنان؟

بە کورتی وەڵامەکە ئەوەیە کە نەخێر پارێزراو نییە، لەبەر چەند هۆکارێک:

• زۆربەی بەرنامەکانی پارێزگاری و دژەڤایرۆس ئەم ئامرازە وەک ڕێگەیەکی هاککردن دەبینن و لە کاتی دابەزاندنیدا ڕاستەوخۆ ئاگادارت دەکەنەوە و بەرنامەکە بلۆک دەکەن، هەر بۆیە  کەی ئێم سپیکۆ داوات لێدەکات لە کاتی دابەزاندنی بەرنامەکەدا دژە ڤایرۆس و سیستەمی پارێزگارییەکەت بکوژێنیتەوە، ئەمەش ڕێگە خۆشدەکات بۆ دامەزراندنی هەر فایل و بەرنامەیەکی زیانبەخش لەسەر سیستەمەکەت بە ئارەزووی خۆی.
• زۆربەی کات کەی ئێم سپیکۆ ویندۆزەکە ئەکتیڤ دەکات لە ڕێگەی بەکارهێنانی یەکێک لەو لایسنسە دزەپێکراوانەی کە دراوە بە کۆمپانیاکانی بەرهەمهێنانی لاپتۆپ، ئەمەش لە ڕێگەی پەیوەست بوون بە سێرڤەرێکەوە کە تۆ نازانیت هی كێیە و لەگەڵ لایسنسەکەدا چی تر دەنێرێتەوە بۆ سیستەمەکەت.
• چەندەها وەشانی جیاوازی ئەم ئامڕازە بوونی هەیە، ئەگەر لە گۆگڵ گەڕانێک بکەیت بۆ وشەی KMSpico دەبینیت چەندەها وێبسایتت بۆ دێنێت بۆ داونڵۆدکردنی ئامڕازەکە و هەمووشیان بانگەشەی ئەوە دەکەن کە وێبسایتی فەڕمی ئامڕازەکە ئەوانن! کە دەکرێت هەر یەک لەمانە ڤایرۆس و فایلی زیانبەخش و ئامڕازی سیخوڕی جیاوازیان لەگەڵ تێکەڵ کرابێت.


• بە زۆری ئەو ڤایرۆسەی کە لەگەڵ KMSpicoدایە بریتیە لە تڕۆجان، کە هەندێکیان دوای جێگیربوونیان لە سیستەمەکەتدا چەندەها ڤایرۆسی تر لەگەڵ خۆیاندا دەهێنن، هەندێکیان تایبەتن بە چاودێریکردن و دزینی زانیارییە تایبەتەکانت، هەندێ کاتیش بریتین لە ڕانسۆموێر کە هەموو فایلەکانی سیستەمەکەت تەشفیردەکات و ناتوانیت بەکاریان بهێنیت.
• لە دوایین هەواڵیشدا بە گوێرەی توێژەرەکانی ڕێد کەناری تیبینیان کردووە کە یەکێک لە وەشانەکانی کەی ئێم سپیکۆ ئامرازێکی تری لەگەڵ دەمجکراوە کە ناوی "Cryptbot"ە و هەڵدەستێت بە دزینی داتا هەستیارەکانت بە تایبەتی دزینی هەژماری کریپتۆکەرەنسی(دراوی گریمانەیی)، کریپتۆبۆت دەتوانێت زانیاری هەستیار دزەپێبکات لە هەر یەک لەم بەرنامانەوە:
  Atomic cryptocurrency wallet
  Avast Secure web browser
  Brave browser
  Ledger Live cryptocurrency wallet
  Opera Web Browser
  Waves Client and Exchange cryptocurrency applications
  Coinomi cryptocurrency wallet
  Google Chrome web browser
  Jaxx Liberty cryptocurrency wallet
  Electron Cash cryptocurrency wallet
  Electrum cryptocurrency wallet
  Exodus cryptocurrency wallet
  Monero cryptocurrency wallet
  MultiBitHD cryptocurrency wallet
  Mozilla Firefox web browser
  CCleaner web browser
  Vivaldi web browser

بۆیە پێویستە دامەزراوە فەڕمی و بزنسەکان یان ئەو کەسانەی مامەڵە بە دراوی گریمانەییەوە دەکەن و داتا و زانیاری هەستیاریان هەیە خۆیان لەم ئامڕازە بەدوور بگرن، لە جیاتی ئەوە بیر لە کڕینی وەشانی ڕەسەنی ویندۆز و بەرنامەکانی مایکرۆسۆفت ئۆفیس بکەنەوە چونکە تێچووەکەی زۆر کەمترە لەوەی کە تۆ لە سایەی ئەم ئامڕازەوە تووشی ڕانسۆموێر و دزینی پارە و داتاکانت ببیتەوە کە بێگوومان تێچووەکەی بە هەزاران دۆلار دەبێت.